धादिङबेशीमा भोलि देखि लाखे जात्रा सुरु हुने

धादिङबेशी सदरमुकाममा भोलि देखि लाखे जात्रा सुरु हुँदैछ । आज झिंगु नेवा समाज धादिङले पत्रकार सम्मेलन गरी जात्राको सम्पुर्ण तयारी सकिसकेको जानकारी दिएको छ।

जनैपूर्णिमा, रक्षाबन्धन र गाईजात्राको अवसरमा नेवार समुदायको संस्कृति, परम्परा र पहिचानलाई मध्यनजर गर्दै भोलिदेखी परम्परागत शैलीमा लाखे जात्राको सुरुवात गरिने झिंगु नेवा समाज धादिङका महासचिव राजकुमार श्रेष्ठले पत्रकार सम्मेलनमा बताउनुभयो ।

भोलि सोमबार विहान साढे सात बजे बिचबजार चोकस्थित गणेश मन्दिरमा लाखेको विधिवत पुजा गरी जात्राको शुभारम्भ गरिने छ । विगतमा लाखेजात्रा पञ्चेबाजा बजाई लगाउदैं आएको भएता पनि संस्कृती, परम्परा, पहिचानलाई मध्ये नजर गर्दै धादिङबेसी बजारमा नेवार समुदायको आफ्नै बाजा बजाई परम्परागत शैलीमा लाखे जात्राको सुरुवात गरिन श्रेष्ठले बताउनुभयो ।

भाद्र ४ गते गाइजात्राको अवसरमा विहान ७ः३० बजे मृत्यु भएका ६ जना नेवार समुदायका मृतकको फोटो सहित गाई निकालिन्छ भने दिउसो २ः०० बजे देखि मृतक परिवारको घरसम्म लाखे सहित गाई जात्रा परिक्रमा गरिने श्रेष्ठले बताउनुभयो ।

त्यस्तै भाद्र ५ गते हिले जात्राको दिन दिउसो २ बजे देखि धादिङबेसी बिचबजार क्याम्पस चोक देखि साघुटार पुल्चोकसम्म खेत रोपाइको अभिनय गर्दै लाखे सहित परिक्रम गरिने,भाद्र ११ गते सुगमटोल स्थित राधाकृष्ण मन्दिरबाट भगवान कृष्णको रथ यात्रा निकाली लाखे सहित बजार परिक्रमा गरिने, २१ गते हरितालिका तिजको अवसरमा धादिङ बेसीबिच बजार चोकमा लाखे नाँच नचाइने र भाद्र २२ गते विहान ७ः३० बजे बिचबजार चोक स्थित गणेश मन्दिर अगाडी लाखे जात्रा विधिवत रुपमा यो वर्षको लागि समापन गरिने उहाँको भनाई छ।

नेवार समुदायको विशेष जात्राको रुपमा लाखे जात्रा निलकण्ठ नगरपालिकाको वडा नं. ३ को शितलबजार बजार लाखे समुह र धादिङबेसी लाखे समुह, वडा नं. ५ को फ्याक्से, वडा नं. ६ को सुनौलाबजार, वडा नं. ११ को ज्यामरुङ दरबार र सिम्ले बजार, वडा नंं. १४ को भंगेरीस्थान र अम्बोटेमा दिउँसोे २ बजे देखि राति ९ बजेसम्म सञ्चालन हुनेछ ।

नेवार समुदायको जात्रा भएपनि जात्रामा स्थानिय प्रशासन, नगरपालिका, तथा सम्पूर्ण धादिङबासीहरुलाई सहयोग र सहभागिताको लागि झिंगु नेवाः समाज धादिङले अनुरोध समेत गरेको छ ।