मेयरकाे अध्यक्षतामा मुसिकोट नगरपालिकाकाे प्रधानाध्यापक बैठक सम्पन्न , केके भए त निर्णय ?

कर्णाली खाम, मुसिकाेट। रुकुम पश्चिमको मुसिकोट नगरपालिका अन्तर्गतका विद्यालयका प्रधानाध्यापकहरुको २६ औँ बैठक नगर प्रमुख एवम् नगर शिक्षा समितिका अध्यक्ष देवीलाल गौतमको अध्यक्षता सम्पन्न भएको छ । सामाजिक विकास समिति संयोजक शुसिल गौतम, निमित्त प्रमुख प्रशासकीय अधिकृत बिनाराम खड्का, लेखा अधिकृत नरेन्द्र बिष्टको आतिथ्यतामा २०७८ भाद्र ४ गते सम्पन्न भई विभिन्न समेत निर्णय गरेको छ ।

शिक्षा तथा मानव स्रोत विकास केन्द्रको निर्देशन बमोजिम २०७८ भाद्र १५ गतेसम्म विद्यालयको IEMIS तथ्याङ्क अध्यावधिक गर्ने । IEMIS लगायत वैकल्पिक विधिबाट शिक्षण सिकाइ सम्बन्धमा बिनाराम खड्का, त्रिपुरा मावि छिङ्गका प्रअ शंकर कुमार रावल र सुचना प्रविधि अधिकृत गोपाल वलीले सहजीकरण गर्नुभएको थियो ।

बैठकले विद्यालयमा उपलब्ध प्रविधि, जनशक्ति, साधन स्रोत, पुर्वाधार, विद्यार्थीको पहुँचको आधारमा उपयुक्त सम्भव विधि पहिचान र प्रयोग गरी पठनपाठनलाई सुचारु गर्ने निर्णय गरिएको छ ।

साथै कुनै पनि बैकल्पिक विधिमार्फत विद्यार्थीको पठनपाठन सुचारु गर्न सम्भव नभएको अवस्थामा सम्बन्धित अभिभावकहरुको लिखित मन्जुरीमा कोभिड १९ को जोखिमबाट सुरक्षित रहनको लागि विद्यालयले पुरा गर्नुपर्ने मापदन्ड विद्यालयले पुरा गर्ने र विद्यार्थीले पुरा गर्नुपर्ने स्वास्थ्यसम्बन्धी मापदन्ड विद्यार्थी तथा अभिभावकले पुरा गर्ने शर्त सहित संघीय सरकार र स्थानीय सरकारले जारी गरेका नीति निर्देशनलाई समेत मध्यनजर गर्न भनिएको छ ।

कक्षागत रुपमा, तहगत रुपमा र विद्यार्थी संख्याको आधारमा समुह निर्माण तथा विद्यालय व्यवस्थापन समिति, शिक्षक अभिभावक संघको निर्णय परामर्श समेत लिई सिफ्ट निर्माण गरी वडा कार्यालयको समन्वयमा २०७८ साल भाद्र १३ गतेदेखि विद्यालयमा भौतिक रुपमा पठनपाठन गर्नको लागि आवश्यक निर्णयार्थ मुसिकोट नगरपालिका समक्ष अनुरोध गर्ने निर्णय गरेको रातो तारा स्कुल सल्लेका संस्थापक अध्यक्ष हरिविष्णु ओलीले जानकारी दिनुभयो ।

सामुदायिक तथा संस्थागत विद्यालयका प्रअ र IEMIS मा काम गर्ने शिक्षक-कर्मचारीको सहभागिता रहेको बैठकको संचालन जन कल्याण माध्यमिक विद्यालय काँशपोखरीका प्र.अ. रामप्रसाद वलीले गर्नुभएको बताइयाे ।